Aron Kristjánsson: Vonandi hafa Pólverjarnir ekki lært of mikið

Aron Kristjánsson, EM-sérfræðingur Vísis, viðurkennir að hann vonaðist við að sleppa við Frakka í undanúrslitunum en að honum lítist vel á leikinn við Pólverja um þriðja sætið í dag.

„Maður var svolítið pirraður á því að við skyldum mæta Frökkunum í undanúrslitunum af því að það var eina liðið sem maður vildi losna við.

Frakkar virðast vera númeri of stórir og henta okkur illa miðað við Pólverja og Króata."

„Mér lýst vel á þennan leik í dag. Pólverjarnir eru með stórar skyttur sem eru með gríðarlegan skotkraft utan af velli. Varnarlega munum við stilla upp í mjög agressíva 6:0 vörn þar sem strákarnir munu koma langt út á móti Bielecki og þessum körlum."

„Við þurfum að taka mjög fast á þeim, mæta þessum skyttum mjög framarlega og við þurfum í leiðinni að eyðileggja þessa flugbraut sem þeir þurfa. Við þurfum að brjóta upp leikkerfin þeirra þannig að þeir fái ekki þessar flugbrautir."

„Ég held að Gummi þekki Pólverjana mjög vel frá því á Ólympíuleikunum. Þar heppnaðist taktíkin hans á móti þeim alveg frábærlega."

„Það er vonandi að Pólverjarnir hafi ekki lært of mikið af þeim leik. Það er spurning sem maður spyr sig: Hversu mikið lærðu þeir af leiknum á Ólympíuleikunum og hversu stemmdir verða þeir fyrir leikinn í dag? Maður getur ímyndað sér að það sé svolítill hugur í þeim að borga fyrir það tap og reyna að ná í verðlaun hérna."

„Að sama skapi hljóta íslensku strákarnir að vera hungraðir í bronspeninginn því þeir eru búnir að spila frábærlega hérna á EM. Það er vonandi að þeir nái að safna kröftum fyrir leikinn í dag og nái að klára þetta."

„Mér fannst vera svolítil þreyta komin í mannskapinn á móti Frökkum í gær og það er spurning hverjir nái að laða fram sitt besta í dag."

„Það eru auðvitað vonbrigði að missa af gullleiknum en ég held að menn sjái það alveg að það sé virkilega stórt fyrir Ísland að spila um þriðja sætið. Það er frábært að við séum að spila til verðlaun á EM og það væri mjög gaman ef við gætum tekið skrefið upp á við og unnið önnur verðlaun."

„Með því myndum við gera okkur stöðugri í þeirri baráttu. Við höfum áður verið í undanúrslitum á EM og þar enduðum við í fjórða sæti og þannig að það væri frábært ef strákarnir næðu að stíga skrefið og taka verðlaun í dag."