Breiðfirsk perla

Þann 4. nóvember sl. komu út frímerki , þar á meðal eitt með málverki Sigurlaugar Jónasdóttur frá Öxney af Pétri Einarssyni frá Arney. Pétur var sannkallaður brautryðjandi í jafnréttismálum þar sem hann nefndi bæði kynin kall minn. Hann var eini maðurinn sem um er vitað sem lagði lóðir á Breiðafirði og sofnaði síðan í bátnum. Pétur sofandi í bátnum með afla sinn er myndefnið.

Þeir sem sigla Breiðafjörð vita að þar eru margar hættur, boðar og voðasker sem hafa grandað fólki frá því að land byggðist. Sigurlaug stóðst ekki mátið og hefur málað fjölmargar myndir af Pétri þar sem botninn á stígvélunum er misstór. Allt eru þetta dásam­legar myndir með mikilli dýpt, fegurð og virðingu fyrir manninum sem verður hluti náttúrunnar .

Pétur dó á síðari hluta 20. aldar og á fyrri hluta aldarinnar var ekki lenska að hrósa konum eða láta þær gjalda sannmælis fyrir störfin. Pétur var ákafur talsmaður kvenna og hélt mjög á lofti dugnaði breiðfirsku kvennanna sem stunduðu sjó og tóku jafnan þátt í karlastörfum. Einkum var hann hrifinn af Júlíönu Silfá hálfsystur sinni sem var hreiður­drútur föður síns , þ.e.a.s. hún var ekki hjónabandsbarn. Þessi frábæra kona varð rúmlega hundrað ára og bjó í Langey. Þegar karlmenn sögðu afrekssögur af lúðu­veiðum eða erfiðum siglingum, kunni Pétur ævinlega betri og kröftugri sögu af Júllu systur. Pétur kvæntist ekki en mikill og sterkur ættbogi er út af Júlíönu í Langey.

Sigurlaug Jónasdóttir, listmálari, fæddist 1913 í Öxney á Breiðafirði. Hún missti móður sína 14 ára gömul og varð að taka við heimili með 12 börnum. Það þýðir víst lítið að segja nútímafólki þetta. Enda kvartaði hún oft yfir því hvað viðmælendur hennar botnuðu ekkert í heimi verka hennar, þar sem úir og grúir af börnum við vinnu og alls staðar er Elín móðir hennar ófrísk. Hún braust til mennta og dvaldist öll stríðsárin í Noregi þar sem hún menntaðist sem kennari og stótti teiknitíma hjá virtum skóla.

Veraldlegur auður þyngdi ekki Öxneyingum en miklar gáfur og listfengi einkennir þetta fólk sem dreifst hefur um heiminn. Á myndinni rammar báturinn efnið eins og á fornum helgimyndum, sofandi maðurinn, ómælisvíðátta hafsins, aflanum raðað í skutinn, allt eins og hún mundi þetta! Nú fer frímerkið hennar Sigurlaugar með fegurð Breiðafjarðar og kappanum Pétri Einarssyni frá Arney um heiminn, sannarleg breiðfirsk perla.