Formaður löggiltra endurskoðenda stjórnarmaður PwC

„Ég á erfitt með að tjá mig um málið," segir Þórir H. Ólafsson, formaður Félags löggiltra endurskoðenda, en það vill svo til að hann er einnig stjórnarmaður í PricewaterhouseCoopers (PwC), sem hefur legið undir harðri gagnrýni í tveimur erlendum skýrslum sem voru unnar fyrir embætti sérstaks saksóknara.

Skýrslurnar sem um ræðir taka fyrir Landsbankann annarsvegar og svo Glitni. PwC var endurskoðandi beggja bankanna. Fyrirtækið sætir harðri gagnrýni, meðal annars í ljósi þess að í skýrslunni sem tekur fyrir Landsbankann, kemur fram að bankinn var tæknilega gjaldþrota árið 2007. Þrátt fyrir það kvittuðu endurskoðendur PwC undir ársreikninginn.

Þá er það fullyrt í skýrslunum að PwC hafi ekki tengt saman aðila sem voru augljóslega tengdir og fengu tugi milljarða lánaða út úr bönkunum. Svo virðist sem endurskoðendafyrirtækið hafi til dæmis ekki séð hagsmunatengslin á milli félaga tengdum Jóni Ásgeiri og Glitnis þegar þau fengu milljarða að láni.

Þegar Vísir hafði samband við formann Félags löggiltra endurskoðenda til þess að kanna viðbrögð félagsins vegna málsins kom í ljós, eins og fyrr greinir frá, að formaður félagsins er jafnframt stjórnarmaður hjá PwC. Þórir baðst því undan að tjá sig um málið vegna augljósra hagsmunatengsla.

PricewaterhouseCoopers sendu frá sér yfirlýsingu í dag þar sem þeir sögðust ekki geta varið hendur sínar þar sem þeir hefðu ekki skýrslurnar undir höndum. Þá gagnrýndu þeir leka skýrslnanna til fjölmiðla harðlega.