Mæta fúlskeggjaðir á blaðamannafund Seðlabanka Íslands

„Við ætlum að mæta á blaðamannafundinn og fá þetta endanlega staðfest," segir matargerðamaðurinn Úlfar Eysteinsson en hann og Tómas Tómasson, eigandi Hamborgarabúllu Tómasar, munu raka af sér stýrivaxtaskeggið í dag.

Eins og kunnugt er þá ákváðu þeir félagar fyrir jól að skerða ekki hár á andliti sínu fyrr en Seðlabanki Íslands lækkaði stýrivexti niður fyrir tíu prósent.

Það langþráða markmið þeirra félaga náðist í dag, stýrivextir eru níu og hálft prósent.

Spurður hvort hálft prósent þýði ekki að þeir raki eingöngu helming skeggsins, segir Úlfar svo ekki vera. Takmarkið hafi verið skýrt, undir tíu prósent og skeggið fær að fjúka.

„Ég er dauðfeginn að losna við þetta mikla magn," segir Úlfar en hann og Tommi hafa verið með svo mikið skegg að þeir léku jólasveina í hjáverkum fyrir jól og þurftu lítið annað en rauðan galla til þess að fullkomna hlutverkið.

Spurður hvernig það hafi gengið að vera með svona mikið skegg, hvort það hafi ekki verið til óþæginda, svarar Úlfar: „Um tíma var það allt í lagi. Og kvenpeningnum fannst þetta sjarmerandi. Svo var þetta orðið dálítið mikið."

Peningastefnunefnd seðlabankans kynnir stýrivaxtalækkunina og rök fyrir henni á blaðamannafundi klukkan ellefu í dag. Þangað munu Úlfar og Tommi mæta galvaskir en þeir hafa ekki ákveðið hvar þeir munu raka sig.