Aron var búinn að skora fyrsta markið fyrir Kiel eftir eina mínútu

Aron Pálmarsson lék sinn fyrsta leik með þýska liðinu Kiel í æfingaleik á móti sameiginlegu liði Kreisen Lauenburg og Stormarn. Aron skoraði tvö mörk í 42-13 sigri þýsku meistaranna.

Aron kom inn á á 15. mínútu leiksins og það tók hann aðeins eina mínútu að komast á blað. Honum er hrósað fyrir óeigingjarnt spil á heimasíðu Kiel. Alfreð Gíslason, þjálfari Kiel, segist í viðtalið við heimasíðuna ætla að gefa Aroni tíma til að komast inn í hlutina.

„Aron er nýkominn til okkar eftir HM unglinga og hann þarf allavega tvo mánuði til að komast almennilega inn í þetta hjá okkur," sagði Alfreð.