Gunnar Steinn markahæstur í tapleik

Gunnar Steinn Jónsson skoraði sjö mörk fyrir Drott sem tapaði fyrir Redbergslid í sænsku úrvalsdeildinni í handbolta í kvöld, 28-26.

Drott er í sjöunda sæti deildarinnar með tíu stig eftir ellefu leiki en Redbergslid er í fjórða sæti með tólf stig, tveimur á eftir toppliði Alingsås.

Í Þýskalandi skoraði Einar Ingi Hrafnsson eitt mark fyrir Nordhorn sem vann nauman útivallarsigur á Dessau-Rosslauer í norðurriðli þýsku B-deildarinnar, 30-29. Einar Ingi fékk að líta rauða spjaldið á 45. mínútu leiksins þegar hann fékk sína þriðju brottvísun í leiknum.

Nordhorn er í þriðja sæti riðilsins með nítján stig, sex stigum á eftir taplausu toppliði Hamm.

Þá var einnig spilað í Sviss í dag. Kári Kristján Kristjánsson og félagar í Amicitia Zürich unnu stórsigur á Yellow Winterthur, 35-15. Amicitia er í öðru sæti deildarinnar með 20 stig, fjórum á eftir toppliði Kadetten Schaffhausen.