Formaður norska Miðflokksins vill myntsamstarf við Ísland

Liv Signe Navarsede formaður norska Miðflokksins og samgöngumálaráðherra Noregs vill að Norðmenn taki upp myntsamstarf við Íslendinga og bjargi þeim þar með frá Evrópusambandsaðild.

Þetta kemur fram í samtali norskra fjölmiðla við Liv í morgun. Hún segir að sem leilðtogi flokksins, vilji hún vinna að þessu máli í samvinnu við Samfylkinguna og Vinstri græna, sem nú hafa myndað nýja ríkisstjórn á Íslandi.

Hún nefnir einnig að leiðtogi Vinstri grænna , Steingrímur J. Sigfússon, hafi þegar viðrað þessar hugmyndir. Á hún þar við viðtal sem birtist við Steingrím í blaðinu Klassekampen fyrir helgina.

Á vefsíðunni e24.no er fjallað um málið og þar er m.a. vitnað til orða Kristin Halvorsen fjármálaráðherra Noregs í Dagsavisen auk Liv Signe.

Kristin segir þar að hún muni heimsækja Ísland um næstu helgi til að samfagna VG með 10 ára afmæli sitt en vill ekki tjá sig um mögulegt myntsamstarf við Noreg.

Liv Signe liggur hinsvegar ekki á þeirri skoðun sinni að engin þjóð ætti að neyðast til að ganga í Evrópusambandið til að taka upp evruna vegna efnahagserfiðleika. "Allir eiga að geta metið aðild sína án skilyrða," segir Liv Signe.