Þóra hélt marki Kolbotn hreinu þriðja leikinn í röð

Landsliðsmarkvörðurinn Þóra Björg Helgadóttir er að standa sig vel með Kolbotn í norsku úrvalsdeildinni en hún og félagar hennar eru í öðru sæti eftir 2-0 sigur á Sandviken í gær.

Þóra Björg hélt þarna marki sínu hreinu þriðja leikinn í röð en hún hefur nú ekki fengið á sig mark í heilar 320 mínútur í öllum keppnum. Þóra fékk á sig mark í fimm af fyrstu sex leikjunum en hefur nú haldið hreinu í þeim þremur síðustu.

Kolbotn er í 2. sæti með jafnmörg stig og topplið Stabæk en með lakari markatölu og einum leik meira. Þóra hefur bara fengið á sig 6 mörk í 8 deildarleikjum á tímabilinu.