Meistaradeildin: HSV í undanúrslit

HSV varð í kvöld fyrsta liðið til þess að tryggja sér farseðilinn í undanúrslit Meistaradeildar Evrópu. Liðið tapaði þá fyrir Flensburg, 29-31, í síðari leik liðanna en þriggja marka sigur, 25-28, í fyrri leiknum fleytti liðinu áfram.

Leikurinn var stórkostleg skemmtun og þá sérstaklega síðari hálfleik. Flensburg var með afar hagstæða stöðu lengstum í síðari hálfleik er liðið leiddi með fjórum til fimm mörkum.

Liðið var þess utan búið að skora nógu mikið til að komast áfram með þriggja marka sigri. Leikmenn Flensburgar fóru á taugum undir lokin og fóru þess utan einstaklega illa að ráði sínu í lokasókninni.

Þá voru þeir með sjö menn í sókn og HSV manni færri. Tíu sekúndur voru eftir en sókn Flensburgar gekk ekki betur en svo að hinn hálfíslenski Hans Lindbergh náði að stöðva sóknina áður en Flensburg kom skoti á markið.

Fögnuður leikmanna HSV var gríðarlegur í leikslok en Per Carlen, þjálfari Flensburg, var gráti næst. Hann hreinlega trúði því ekki að sínir menn hefðu klúðrað leiknum.

Á morgun fara fram tveir leikir í átta liða úrslitunum. Evrópumeistarar Ciudad Real með Ólaf Stefánsson fremstan í flokki sækja Fotex Veszprem heim en Ciudad vann fyrri leikinn með fimm marka mun. Alfreð Gíslason og lærisveinar hans í Kiel taka síðan á móti Croatia Zagreb en fyrri leik þeirra liða lyktaði með jafntefli.

Á sunnudag mæta Guðjón Valur Sigurðsson og félagar í Rhein-Neckar Löwen síðan rússneska liðinu Chehovski Medvedi.