Islendingar skulda enga 2000 milljarða

„Ef þú tekur brúttóskuldir þjóðarinnar geturðu fengið mjög háar tölur," segir Steingrímur J. Sigfússon fjármálaráðherra. Hann segir að þegar að menn leggðu saman innlendar og erlendar skuldir þjóðarinnar væri áræðanlega hægt að fá út að þær væru eitthvað á þriðja þúsund milljarða. Þegar að nettóskuldastaða þjóðarinnar væri skoðuð myndi allt önnur staða blasa við.

Tryggvi Þór Herbertsson, prófessor í hagfræði, sagði í Kastljósi í gær að skuldastaða þjóðarinnar væri allt önnur en rætt hefði verið um. Skuldir þjóðarinnar væru 465 milljarðar króna en ekki um 2000 eins og sumir hefðu talað um.

Steingrímur sagði, á blaðamannafundi í Þjóðmenningarhúsinu í dag, að við bjartsýnustu spár gætu menn kannski komist niður í sömu tölu og Tryggvi Þór gerði í gærkvöldi en hann óttaðist þó að skuldastaðan væri verri. Steingrímur sagði að verið væri að taka saman eins áreiðanlegar tölur yfir skuldastöðu þjóðarinnar og mögulegt væri. Þær yrðu kynntar Alþingi við fyrsta tækifæri.