Stjórnvöld fordæma árásina

Strax og árás Ísraelsmanna hófst á Gasasvæðið lýsti utanríkisráðherra Íslands því yfir fyrir hönd íslenskra stjórnvalda að hún væri óverjandi.

Engin önnur stjórnvöld í Evrópu tóku svo sterkt til orða strax í upphafi, en þeim ríkjum fer sem betur fer fjölgandi sem beita röddu sinni á alþjóðavettvangi á sama hátt.

Ríkisstjórn Íslands er ekki fjölskipað stjórnvald og hver ráðherra hefur forræði á sínum málaflokki. Þegar utanríkisráðherra talar um utanríkismál tala íslensk stjórnvöld og ríkisstjórn Íslands.

Ísland fordæmdi harðlega innrás landhers Ísraela þegar hún hófst á Gasa og harmaði aðgerðaleysi öryggisráðs Sameinuðu þjóðanna. Áður en innrás landhersins hófst sendi utanríkisráðherra Tzipi Livni, utanríkisráðherra Ísraels, bréf, þar sem hún fordæmdi hernaðaraðgerðirnar sem aldrei gætu leitt til viðvarandi friðar og öryggis.

Var Ísrael hvatt til að fallast á vopnahléstillögu Evrópusambandsins sem þá lá fyrir. Ísland fordæmi hernaðinn á opnum fundi öryggisráðs Sameinuðu þjóðanna í New York og í mannréttindaráði Sameinuðu þjóðanna í Genf fyrir helgina og sagði alþjóðasamfélagið verða að grípa inn í. Afstaða Íslands gæti ekki verið skýrari og afdráttarlausari á alþjóðavettvangi. Það sýnir t.d. frétt Jerusalem Post með fyrirsögninni Ísland fordæmir innrás á Gasa sem Fréttablaðið hefur sagt frá hér heima.

Sumir íslenskir fjölmiðlar reyna af fremsta megni að sýna fram á að meintur ágreiningur í ríkisstjórn geri þessa afstöðu Íslands á einhvern hátt ómerkilegri en hún gæti verið. Samt hefur Geir H. Haarde forsætisráðherra í viðtölum við íslenska fjölmiðla tekið undir afstöðu utanríkisráðherra, ítrekað staðfest að um málið sé enginn ágreiningur innan ríkisstjórnar og yfirlýsingar Íslands nú á alþjóðavettvangi hafi nákvæmlega sama slagkraft röddu Íslands og allar yfirlýsingar sem áður hafi verið gefnar, ef ekki meiri.

Ég hvet fólk til að kynna sér þær fjölþættu aðgerðir sem þessi ríkisstjórn hefur staðið fyrir síðustu átján mánuði í málinu og eiga sér ekki fordæmi í utanríkisstefnu Íslands.

Höfundur er aðstoðarmaður utanríkisráðherra.