Lífeyrissjóðir krefja þrotabú Landsbankans um tugi milljarða

Nánast útilokað er að lífeyrissjóðir landsins fái nokkuð upp í hátt í hundrað milljarða kröfu sem þeir gera í þrotabú Gamla Landsbankans.

Milljarða kröfur hafa að undanförnu streymt í þrotabú Landsbankans úr öllum heimshornum. Frá Bretlandseyjum, Austurlöndum fjær ásamt löndum á borð við Andorra Kazakstan.

Samtals nema kröfurnar um 6.400 milljörðum króna. Í einhverjum tilfellum er kröfum lýst oftar en einu sinni. Þetta kemur fram í kröfuskrá bankans sem fréttastofa hefur undir höndum.

Forgangskröfum upp á 2.800 milljarða er lýst í þrotabúið. Af þeim hefur slitastjórn bankans samþykkt hátt í þrettán hundruð milljarða. Líklegt er að það sé endanleg tala, samkvæmt heimildum. Nýjasta mat gerir ráð fyrir að hátt í níutíu prósent fáist upp í samþykktar forgangskröfur, sem að megninu eru tilkomnar vegna Icesave. Það þýðir að ekkert fæst upp í stóran hluta af lýstum forgangskröfum, eða 1500 milljarða.

Kröfur lífeyrissjóða landsins eru gífurlega margar en eftir því sem næst verður komist nema þær samtals hátt í 90 milljörðum.

Þá gerir Fjármálaráðuneytið 80 milljarða kröfu og Seðlabankinn krefst 17 milljarða, svo eitthvað sé nefnt.

Ljóst þykir að ekkert fáist upp í kröfur lífeyrissjóðanna, Seðlabankans né ríkisins frekar en aðrar almennar kröfur í þrotabú bankans.