Kröfulisti Landsbankans: Hjartveikir, blindir og öryrkjar vilja tugmilljónir

Styrktarsjóðir hjartasjúklinga og hjartveikra barna, Blindrafélagið og Öryrkjabandalagið eru meðal félaga sem gera tugmilljóna kröfur í þrotabú Landsbankans samkvæmt kröfulista bankans. Hjartveik börn, sem eru í dómsmáli við bankann, krefjast 47 milljóna.

Blindrafélagið vill fá rúmar 25 milljónir, Heimsfriðarsamtök fjölskyldna rúmar tuttugu, Hjálparsjóður æskufólks vill fá rúmar 34 milljónir, Öryrkjabandalagið vill fá sautján milljónir, Styrktarsjóður hjartsjúklinga krefst rúmra sex milljóna og Kristniboðsfélag kvenna krefur bankann um 4,6 milljónir.

Auk þess krefur Minningarsjóður Margrétar Björgólfs, sem Björgólfur Guðmundsson stofnaði, bankann um rétt rúmar 13 milljónir. Eins og greint frá fyrir skömmu var sá sjóður fjármagnaður með láni frá Landsbankanum, láni sem nú er til skoðunar hjá Fjármálaeftirlitinu.