Ríkisstjórnarsamstarfið að veði í Icesave

Össur Skarphéðinsson segir að ef ekki verði meirihluti fyrir Icesave frumvarpi ríkisstjórnarinnar, verði stjórnin og einstakir ráðherrar að íhuga stöðu sína. Ögmundur Jónasson og Guðfríður Lilja Grétarsdóttir, þurfa að rökstyðja afstöðu sína í Icesave málinu, fyrir almennum flokksmönnum í Vinstri-grænum, á félagsfundi í kvöld. Fullyrt er að ríkisstjórnin standi og falli með afstöðu þeirra í málinu.

Hermt er að slitnað geti upp úr ríkisstjórnarsamtarfi Samfylkingarinnar og Vinstri grænna, fari svo að Ögmundur Jónasson, heilbrigðisráðherra og tveir þingmenn aðrir greiði ekki atkvæði með öðrum stjórnarþingmönnum, með Icesave frumvarpi ríkisstjórnarinnar.

Ögmundur segir að Icesave málið snúist um að hlaða ekki skuldaklafa á þjóðina. Hann finni ríkan vilja í öllum flokkum til að ná sem breiðastri samstöðu um fyrirvara við ríkisábyrgð um Icesave sem tryggi hagsmuni Íslands sem best. Ríkisstjórnin hafi ekki verið mynduð um tiltekna niðurstöðu í Icesave málinu.

Heimildarmenn fréttastofu hafa hins vegar miklar áhyggjur af framtíð stjórnarsamstarfsins og nefna sem dæmi að allt íslenskt efnahagslíf sé í gíslingu málsins.

Vinstri grænir í Kraganum koma saman á félagsfundi í kvöld. Mikill stuðningur er við frumvarp ríkisstjórnarinnar í hópi stuðningsmanna Vinstri grænna, og segja flokksmenn sem fréttastofa ræddi við í dag, að Ögmundur og Guðfríður verði beðin um að rökstyðja viðhorf sín í málinu.

Össur Skarphéðinsson, utanríkisráðherra og samfylkingarmaður, segir stjórnarsamstarfið ekki í hættu, en svo gæti farið að einstakir ráðherrar þurfi að íhuga stöðu sína.