Á Grundarfirði en ekki á Kýpur

Meintur svikahrappur, Sveinn Friðfinnsson, sem hefur verið í fréttum í dag vegna svikamyllu sem hann er talinn vera á bak við í Svíþjóð hefur að undanförnu dvalið á Grundarfirði þar sem hann er fæddur og á fjölskyldu. Hann er sagður aka um á glæsilegum bílum og hafa haft með lífverði þegar hann var í heimabænum í vor.

Sænskir fjölmiðlar fjalla um málið í dag en þar er sagt að þúsundir svía hafi orðið fyrir barðinu á Sveini og félaga hans. Sænska fjármálaeftirlitið sem rannsakar málið telur svikin hlaupa á milljörðum íslenskra króna. Þá er sagt frá því í sænskum fjölmiðlum að ekkert hafi spurst til Sveins síðan árið 2007 og er hann sagður vera með lögheimili á Kýpur.

Frá því að fréttir voru birtar af málinu í dag hafa fjölmargir haft samband við fréttastofu, aðallega Grundfirðingar, og sagt frá kynnum sínum af Sveini. Hann virðist ekki vera búsettur á Kýpur heldur mun hann nú dvelja á Grundafirði. Sveinn er hinsvegar skráður til heimilis í Skipholti í Reykjavík í þjóðskrá, ásamt franskri eiginkonu sinni og nýfæddum syni. Vísir hefur reynt að ná tali af Sveini í allan dag en þeir sem standa honum næst vilja lítið gefa upp um hvar hann er niðurkominn.

Á svipuðum tíma og hann hvarf árið 2007, virðist hann hinsvegar hafa keypt veitingarekstur af foreldrum sínum á Grundafirði en staðurinn ber heitið Krákan. Hann er einnig sagður hafa farið í það að kaupa talsvert af fasteignum á Grundafirði. Meðal annars trésmiðju auk nokkurra annara húsa.

Þeir sem hafa haft samband við Vísi segja Svein hinsvegar standa illa í skilum við þá sem hann á viðskipti við. Einn orðaði það svo að hann skuldaði flestum iðnaðarmönnum á Grundarfirði peninga.

Í fréttum Stöðvar 2 í kvöld kom fram að Sveinn hafi flutt til Danmerkur fyrir fjórum árum, eftir að hann átti í vafasömum viðskiptum við landa sína hér á landi. Margir töldu sig hlunnfarna í þeim viðskiptum. Það gekk svo langt að handrukkarar voru sendir á eftir honum út, en hann mun hafa komist undan þeim. Fyrir fáum misserum réði Sveinn tvo lögmenn í sína þjónustu til þess að reyna að gera upp við ýmsa þá sem höfðu farið illa út úr viðskiptunum. Hann reyndi einnig að ráða sér almannatengslafulltrúa í því skyni að bæta ímynd sína gagnvart fólkinu.

Ef marka má þá fjölmörgu Grundfirðinga sem hafa haft samband í dag virðist almannatengslafulltrúinn hinsvegar náð litlum árangri í starfi sínu.