Microsoft Íslandi heldur risaráðstefnu

Microsoft Íslandi stendur fyrir risaráðstefnu dagana 19. og 20. janúar. Þar verður farið yfir það mikilvægasta sem fram kom á alþjóðlegu ráðstefnunum TechEd og Convergence sem haldnar voru undir lok síðasta árs í Bandaríkjunum og Danmörku. Ráðstefnan er ætluð tæknimönnum, forriturum og stjórnendum og verður aðgangur ókeypis.

Þetta er í fyrsta sinn sem Microsoft Íslandi heldur slíka ráðstefnu. Er það ekki komið til af góðu, eftir því sem fram kemur í fréttatilkynningu. Ástæðan mun vera algjört hrun í þátttöku íslenskra þekkingarstarfsmanna á alþjóðlegum ráðstefnum og námskeiðum á síðustu mánuðum. Í tilkynningunni segir að Microsoft Íslandi hafi skipulagt hópferðir á ráðstefnur og námskeið á vegum Microsoft erlendis og hafi verið mikil þátttaka síðustu ár.

„Árið 2007 fóru til dæmis um 350 manns á helstu ráðstefnur á vegum Microsoft en á síðasta ári hrundi fjöldinn hins vegar niður í 60. Það þýðir að fækkun þeirra tæknimanna sem gátu tekið þátt í símenntunarferðum á vegum Microsoft var vel yfir 80%," segir í tilkynningunni.

Í tilkynningunni segir að ráðstefnur á borð við TechEd og Convergence eru afar mikilvægar svo þeir sem starfi við upplýsingatækni geti viðhaldið þekkingu og tileinkað sér nýjungar eins fljótt og hægt er.