Ólafur og félagar í Ciudad komust í bikarúrslitin

Ólafur Stefánsson og félagar í Ciudad Real komust i kvöld í úrslit i spænsku bikarkeppninnar í handbolta þegar liðið vann 33-29 sigur á CAI BM Aragón í undanúrslitaleiknum. Ciudad Real mætir Barcelona í úrslitaleiknum á morgun.

Ólafur skoraði fimm mörk úr sjö skotum í leiknum þar af var eitt markanna úr víti. Ólafur var markahæsti leikmaður Ciudad ásamt Rolando Urios. Sigurliðsins var nokkuð öruggur en Ciudad Real var 18-13 yfir í hálfleik.

Barcelona vann 35-26 sigur á Portland San Antonio í hinum undanúrslitaleiknum. Ciudad Real er núverandi spænskur bikarmeistari eftir 31-30 sigur á Barcelona í úrslitaleiknum í fyrra.