Sjö sentimetra munur á lærunum

„Ég fékk högg á lærið í leik gegn Rostock. Leið ekkert sérstaklega illa þá, kláraði leikinn en gamanið fór að kárna þegar ég kom heim," sagði landsliðsmaðurinn Þórir Ólafsson við Vísi.

„Lærið byrjaði að bólgna alveg svakalega þegar ég kom heim. Stækkaði og stækkaði. Ég hef aldrei séð annað eins og hélt að lærið á mér ætlaði að rifna," sagði Þórir sem var svo mikið um að hann náði í málband til að mæla á sér lærin.

„Það var sjö sentimetra munur á lærunum. Ég er nú ekki beint með mjög þykka fótleggi þannig að þetta var ansi mikil stækkun."

Þórir vonast til þess að meiðslin séu ekki alvarleg. Hann á þó ekki von á að spila með Tus N-Lubbecke um helgina en vonast til þess að vera orðinn góður í næstu viku.