Pálmi Rafn tryggði Stabæk jafntefli í opnunarleiknum

Húsvíkingurinn Pálmi Rafn Pálmason tryggði norsku meisturunum í Stabæk stig út úr fyrsta leik tímabilsins þegar liðið gerði 1-1 jafntefli við Lilleström í opnunarleik norsku úrvalsdeildarinnar í kvöld.

Pálmi Rafn lék allan leikinn út á hægri kantinum og skoraði markið á 65. mínútu eftir undirbúing frá Espen Hoff. Markið kom eftir laglega skyndisókn Stabæk-liðsins.

Pálmi Rafn skoraði einnig í meistarakeppninni í Noregi þegar Stabæk vann Valerenga 3-1 um síðustu helgi og er því að byrja tímabilið vel í Noregi.

Báðir þessir leikir hafa farið fram í Telenor Arena sem er glæný og glæsileg innanhússhöll. Pálmi Rafn kann greinilega vel við sig á nýja heimavelli Stabæk.