Staðin að meintum ólöglegum veiðum

Landhelgis­gæslan (LHG) hafði afskipti af tveimur skipum vegna meintra brota á löggjöf um veiðar innan landhelginnar á síðasta sólarhring. Varðskip stóð togarann Sólbak EA að meintum ólöglegum togveiðum á Vestfjarðamiðum og færði skipið til hafnar á Akureyri.

Handfærabátur var þá staðinn að meintum ólöglegum handfæraveiðum innan bannsvæðis suður af Látrabjargi.

Við skoðun eftirlitsmanns LHG kom í ljós að Sólbakur var ekki búinn smáfiskaskilju eða hafði þá lágmarksmöskvastærð sem áskilin er á því svæði þar sem hann var við veiðar. Tók lögreglan á móti skipinu þegar það lagði að bryggju á Akureyri.

Þyrla Landhelgisgæslunnar TF-Líf kom að handfærabátnum og sást greinilega að báturinn hafði veiðarfæri sín í sjó. Skipstjóra bátsins var tilkynnt að bátnum yrði vísað til hafnar þar sem mál hans yrði tekið fyrir. Sigldi báturinn til hafnar í Ólafsvík.

Málin eru í höndum lögreglunnar og voru skipstjórar skipanna teknir til skýrslutöku í gær hjá embætti sýslumannsins á Akureyri og sýslumannsins á Snæfellsnesi.