Seldi íslendingum Nígeríubréf

Sveinn Friðfinnsson, sem grunaður er um milljarða svik í Svíþjóð, var kærður til lögreglunnar hér á landi fyrir fjársvik, um miðjan desember árið 2005. Lögreglan rannsakaði málið í næstum eitt og hálft ár, en felldi það svo niður, í mars árið 2007. Fréttastofa hefur undir höndum skjal, undirritað af fulltrúa í lögfræðideild lögreglunnar, um þetta.

Menn sem töldu sig hlunnfarna í gjaldeyrisviðskiptum við Svein, kærðu hann til lögreglu. Þeir vilja ekki koma fram.

Lögreglumaður sem ekki vill koma fram undir nafni sagði fréttastofu að það væri sem Sveinn hefði selt Nígeríubréf. Hann undraðist að menn hefðu átt í þessum viðskiptum; enn fremur að dæmi væru um að menn hefðu látið Svein hafa fé til ávöxtunar eftir að hann var kærður til lögreglu. Svo virtist sem græðgin hefði borið þá ofurliði.

Mennirnir sem sem áttu í viðskiptum við Svein upplýsa að lögmaður, sem Sveinn réði í sína þjónustu, hefði gert þeim tilboð um bætur, fyrir hluta tjónsins sem þeir hefðu orðið fyrir í viðskiptum við hann.

Gerður hefði verið samningur um að fá hluta hins tapaða fjár til baka. Það átti að gerast í fjórum greiðslum. Tvær fyrstu greiðslurnar bárust með skilum, við undirritun í fyrrasumar og svo mánuði síðar. Síðan hafa mennirnir ekki séð krónu. Fréttastofa hefur samning eins mannanna undir höndum. Höfuðstóll bótanna er samkvæmt samningum, tvær milljónir króna.

Einn mannanna sendi málið til innheimtu, en hafði ekki erindi sem erfiði, eftir því sem næst verður komist..

Sænska dagblaðið Dagens Industri upplýsti um svikamyllu, sem Sveinn á að hafa staðið fyrir, í félagi við annan mann, sænskan.

Sænska fjármálaeftirlitið hefur varað við svindlinu. Þarlendur saksóknari rannsakar málið. Hann verst allra frétta.

Svíarnir sem áttu viðskipti við Svein, munu hafa vitað að starfsemi hans væri á „gráu svæði" en hafi hugsað sér að koma peningum framhjá skattinum. Þeir tjá sig um málið í skjóli nafnleysis á sænskri spjallsíðu, en nefna þó Svein.

Sveinn mun dveljast hér á landi, en hann var meðal annars á Grundarfirði í sumar, en hefur undanfarin ár dvalist mikið erlendis; meðal annars í Danmörku, Svíþjóð og á Kýpur.

Fréttastofa hefur reynt að ná af honum tali, en ekki haft erindi sem erfiði.