HM: Óvænt tap Svía

Svíar misstu endanlega af tækifærinu að komast í undanúrslit á HM í handbolta sem fer fram í Króatíu eftir að liðið tapaði óvænt fyrir Ungverjum í dag, 31-30. Staðan í hálfleik var 18-16, Svíum í vil.

Úrslitin þýða einfaldlega að Svíar geta ekki náð Frökkum og Króötum að stigum en bæði lið spila síðar í dag og geta þá tryggt sér sæti í undanúrslitunum.

Tvö efstu liðin úr milliriðlunum tveimur komast áfram í undanúrslitin og leika þessi lið í milliriðli 1.

Leikurinn var nokkuð jafn allan tímann en Ungverjar komust í 16-13 forystu eftir 25 mínútur en Svíar skoruðu fimm síðustu mörk hálfleiksins og náðu því tveggja marka forystu í hálfleik, 18-16.

Síðari hálfleikur var afar jafn og var aldrei meira en tveggja marka munur á milli liðanna. Ungverjar reyndust sterkari á lokakaflanum - komust yfir þegar fimm mínútur voru til leiksloka, 30-29. Jonas Källman jafnaði metin fyrir Svía á 58. mínútu en Gergely Harsanyi skoraði sigurmark Ungverja á næstsíðustu mínútunni.

Ferenc Ilyes var markahæstur hjá Ungverjum með átta mörk og Gabor Csaszar skoraði sjö. Hjá Svíum var Källman markahæstur með átta mörk en Kim Andersson kom næstur með sjö.

Nandor Fazekas átti góðan leik í marki Ungverja og varði nítján skot.

Eina liðið sem getur enn náð Frökkum eða Króötum að stigum er Slóvakía sem mætir heimamönnum í kvöld.

Fyrr í dag unnu Pólverjar stórsigur á Serbum, 35-23, í milliriðli 2 eftir að hafa verið með fjórtán marka forystu í hálfleik, 21-7. Serbum var hreinlega slátrað í fyrri hálfleik en Pólland komst í 9-2, 14-5, 19-6 og svo 21-7.

Pólverjar gáfu reyndar ekki eftir fyrr en stundarfjórðungur var eftir af leiknum og munurinn orðinn sautján mörk, 31-14. Þá fyrst fóru Serbar að minnka muninn en sigur Pólverja vitanlega aldrei í hættu.

Tomasz Tluczynski átti stórleik og nýtti öll ellefu skotin sín í leiknum, þar af þrjú af vítalínunni. Enginn annar leikmaður skoraði meira en fimm mörk. Momir Ilic var markahæstur Serba með sex mörk.

Pólverjar fóru illa að ráði sínu í riðlakeppninni þar sem liðið tapaði bæði fyrir Þýskalandi og Makedóníu en hefur nú hafið milliriðlakeppnina af krafti. Í gær vann liðið sigur á Danmörku og svo Serbíu í dag.

Pólland á því þrátt fyrir að hafa komið stigalausir í milliriðlakeppnina enn von um að komast í undanúrslitin en það ræðst þó að stórum hluta á úrslitum annarra leikja í riðlinum í dag.

Þegar þetta er skrifað eigast við Þýskaland og Noregur og svo síðar í kvöld mætast Danmörk og Makedónía.

Milliriðill 1:

Úrslit:

Svíþjóð - Ungverjaland 30-31

Staðan:

Frakkland 6 stig (+21 í markatölu)

Króatía 6 (+10)

Slóvakía 3 (-6)

Ungverjaland 3* (-9)

Svíþjóð 2* (-6)

Suður-Kórea 0 (-10)

* eftir fjóra leiki, önnur lið hafa leikið þrjá leiki

Næstu leikir:

17.30 Suður-Kórea - Frakkland

19.30 Króatía - Slóvakía

Milliriðill 2:

Úrslit:

Serbía - Pólland 23-35

Staðan:

Þýskaland 5 stig (+17 í markatölu)

Danmörk 4 (+1)

Pólland 4* (+8)

Serbía 3* (-12)

Noregur 2 (-3)

Makedónía 2 (-11)

* eftir fjóra leiki, önnur lið hafa leikið þrjá leiki

Næstu leikir:

16.30 Noregur - Þýskaland

19.15 Danmörk - Makedónía