Hitað upp fyrir varaformannsslaginn

Þeir Árni Páll Árnason og Dagur B. Eggertsson berjast um sæti varaformanns Samfylkingarinnar á landfundi flokksins sem fer fram um helgina. Ljóst er að baráttan verður hörð og má segja að tvær skoðanir á hlutverki varaformanns takist þar á. Annarsvegar hvort varaformaður Samfylkingarinnar eigi að standa við hlið formannsins á þingi eða hvort hann eigi að efla tengsl flokksins við sveitastjórnarstigið. Vísir sló á þráðinn og heyrði hljóðið í þeim félögum.



Mikilvægt að forystan horfi ekki einungis til Alþingis



Dagur segir að barátta þeirra Árna Páls hafi farið mjög prúðmannlega fram. „Ég lít á hann sem meðframbjóðanda frekar en nokkuð annað," segir Dagur. Dagur segist telja mikilvægt að varaformaður Samfylkingarinnar veðri í brúarsmíð á næstunni. „Á milli forystunnar og flokksmanna, milli Alþingis og sveitastjórnarstigsins og líka á milli höfuðborgar og landsbyggðar," segir Dagur.

Af hverju ætti fólk að kjósa þig frekar en Árna Pál?

.„Það er vegna þess að ég tel að við núverandi aðstæður sé sterkara fyrir Samfylkinguna að tefla fram breidd í forystunni Sterkri forystu sem er ekki bara að horfa til þess sem gerist í sölum Alþingis heldur líka í þeim fjölmörgu verkefnum sem liggja utan þess," segir Dagur.

Að spurður segist Dagur ekki vera á leið í ráðherraembætti eftir kosningar jafnvel þótt meirihlutasamstarfi Samfylkingarinnar og Vinstri grænna verði haldið áfram. „Ég er á leið í borgarstjórnarkosningar og ætla svo sem ekki að útiloka að ég verði ráðherra í framtíðinni," segir Dagur en tekur skýrt fram að baráttan um borgina sé framundan.

Dagur segir að sér lítist annars vel á landsfundinn sem framundan er hjá Samfylkingunni. Mikilvægt sé fyrir samfylkingarmenn að koma saman og stilla strengi. Fundurinn sé að mörgu leyti hápunkturinn í starfi flokksins.

Getum ekki skilið formanninn einan eftir á á berangri

„Ég hef nú lítið getað sinnt þessu þar sem ég hef verið bundinn í erfiðum málum í þinginu. Hef verið með nefndarfund í allsherjarnefnd upp á nánast hvern dag og því lítið getað heyrt í fólki," segir Árni Páll sem þó er aðeins byrjaður að heyra í fólki núna. „Svo var ég að koma úr prófkjöri líka, en ég mun bara ræða við landsfundarfulltrúa á fundinum um helgina."

Af hverju ætti fólk að kjósa þig frekar en Dag?

„Dagur er góður kostur og margar ástæður fyrir því að kjósa hann," segir Árni og hlær. Hann nefnir hinsvegar að það sem hann hafi lagt á áherslu í þessari baráttu sé að varaformaðurinn geti verið til vara og stutt formanninn í erfiðum verkefnum.

„Það hafa verið erfiðir tímar síðustu mánuði og það eru erfiðir tímar framundan. Við þær aðstæður tel ég mikilvægt að hafa varaformann í þinginu sem getur þá tekið við verkum frá formanninum. Ég held að mín reynsla henti vel í það hlutverk."

Árni Páll segir mikilvægt að skilja ekki formanninn eftir einan á berangri og í flokknum sé þannig skipulag að verkefni geti flætt fumlaust frá formanni til varaformanns.

„Annars verður formaðurinn gríðarlega berskjaldaður og við megum ekki við því. Þó við séum með vinsælan formann þá er að hefjast nýtt kjörtímabil þar sem hún mun leiða ríkisstjórn sem á að starfa út næsta kjörtímabil. Andstæðingar munu taka öðruvísi á málum og sækja að henni. Þá þurfum við að vera undir það búin að verja hana og styðja í hennar erfiðum störfum."

Árni segir að landsfundurinn leggist annars vel í sig enda sé mikill einhugur og góður andi í flokknum fyrir fundinn.