Hafnaði Eiður tilboði frá Man. City?

Breska slúðurblaðið The Mirror hélt því fram í gærkvöldi að Eiður Smári Guðjohnsen hefði hafnað tilboði frá Man. City og þremur öðrum enskum félögum.

Blaðið segir enn fremur að Eiður sé í viðræðum við franska liðið Monaco og muni semja við það áður en félagaskiptaglugginn lokar á mánudag.

Hin ensku félögin sem Eiður Smári er sagður hafa hafnað eru West Ham, Stoke og Portsmouth. Öll félög með íslenska tengingu.

Annars vekur athygli að svo virðist vera að Barcelona ætli að sleppa Eiði Smára án greiðslu frá félaginu en hann á eitt ár eftir af samningi sínum við félagið.