Ótrúleg aðsókn á Bjarnfreðarson og Avatar

Íslendingar borguðu 25 milljónir í aðgangseyrir um jólahelgina á aðeins tvær myndir. Annars vegar komu níu þúsund manns á Hollywood-stórmynd James Cameron, Avatar og hins vegar mættu ellefu þúsund manns á íslensku kvikmyndina Bjarnfreðarson sem byggir á Vaktarseríunum um þá Georg, Daníel og Ólaf Ragnar.

Elstu menn í bíóbransanum á Íslandi muna ekki eftir annarri eins aðsókn um jólahelgi sem stóð aðeins yfir í tvo daga. Rúmlega 27 þúsund bíómiðar voru keyptir en það þýðir rúmlega þrjátíu og fimm milljónir í miðasölu. Hafi hver gestur síðan keypt sér miðstærð af poppi og kók, en slíkur dúett kostar að meðaltali 620 krónur, þá eyddi þjóðin rúmlega sextán milljónum í slíkan varning á þessum tveimur dögum. Heildartalan nálgast því rúmlega 50 milljónir sem þjóðin greiddi fyrir í kvikmyndahúsum landsins á aðeins tveim dögum.

Sigurður Victor Chelbat hjá Sambíóunum, sem dreifir Bjarnfreðarson, segir þetta vera ótrúlegar tölur. „Með forsýningu og frumsýningu hafa í kringum fjórtán þúsund manns séð myndina sem er náttúrlega frábært,“ útskýrir Sigurður Victor en mikil stemning myndaðist fyrir utan miðasölu Sambíóanna og menn reyttu af sér kunnuglega frasa sjónvarpsþáttanna við fólkið í afgreiðslunni. Sem stendur er Mýrin, stórmynd Baltasars Kormáks, vinsælasta íslenska myndin síðan mælingar hófust en rúmlega 83 þúsund manns sáu hana fyrir tveimur árum.

Sigurður Victor neitar því ekki að í ljósi þessara miklu aðsóknar og góðra dóma sem myndin hefur fengið í fjölmiðlum sé ekkert óraunhæft að horfa til mets Mýrarinnar. „Nei, nei, það þýðir ekkert annað.“

Guðmundur Breiðfjörð, markaðsstjóri Senu sem hefur stórmyndina Avatar á sinni könnu, segir aðsóknina lyginni líkast. „Á sjö dögum hafa rúmlega þrjátíu þúsund manns séð hana og um þessa jólahelgi, sem er jú aðeins tveir dagar, sáu níu þúsund gestir Avatar. Sem er auðvitað ótrúlegt.“