Eimskip semur við skuldabréfaeigendur

Eimskipafélag Íslands hefur samið við eigendur 90% að virði skuldabréfa í flokknum HFEIM081, útgefinn að verðmæti 1,6 milljarðs króna.

Í tilkynningu segir að samkomulag sé um að skuldabréfaeigendur falli frá gjaldfellingarákvæðum sínum og Eimskip hafi nú heimild til að fresta gjalddaga þar til 30 dögum eftir sölu eigna í Norður Ameríku sé lokið en þó eigi síðar en 30. júní.

,,Þá verði öllum vaxtagreiðslum frestað yfir sama tímabil og gjaldfallnir vextir bætast við höfuðstól. Áður hefur verið tilkynnt um samskonar samkomulag við mikinn meirihluta eigenda skuldabréfaflokkanna HFEIM071 og HFEIM072," segir í tilkynningu.

Þá kemur jafnframt fram að Eimskip vinni að samskonar samkomulagi við eigendur annarra skuldabréfaflokka útgefnum af félaginu og mun tilkynna um það innan skamms.