Atvinnuleysið að ná tölunni 13.000

Atvinnulausum heldur áfram að fjölga á nýju ári og á vef Vinnumálastofnunnar eru nú 12.905 skráðir atvinnulausir. Í lok síðasta árs voru 8.982 skráðir án atvinnu og hefur þeim því fjölgað um 3.923 í þessu mánuði.

Greining Glitnis segir í Morgunkorni sínu að fyrrgreindar tölur samsvari því að 206 einstaklingar hafi skráð sig án atvinnu hvern einasta virkan dag janúarmánaðar.

Ljóst er að fjöldi þeirra sem skrá sig án atvinnu hjá vinnumiðlunum hefur ekki aukist jafn mikið í einum mánuði frá því að byrjað var að taka þessar upplýsingar saman í ársbyrjun 2000.

Atvinnuleysi mælist nú 4,8% hér á landi og hefur ekki verið mælst hærra síðan í apríl mánuði 1996 þegar atvinnuleysi var 5,1%. Í niðursveiflunni sem gekk yfir íslenska hagkerfið um miðjan tíunda áratug síðustu aldar fór atvinnuleysi hæst í 7,5% en ljóst er að atvinnuleysið í þessari niðursveiflu verður meira og mun að mati Vinnumálastofnunar líklega fara upp í 9-10% strax á vormánuðum þessa árs.