Starfsfólk Tals tekur ekki þátt í deilu hluthafa

Ragnhildur Ágústsdóttir, forstjóri Tals, segir í yfirlýsingu að starfsfólk fyrirtækisins taki ekki þátt í þeim deilum sem nú eru uppi á milli hluthafa í fyrirtækinu.

„Vegna fréttaflutnings um deilur hluthafa Tals, tel ég rétt að það komi skýrt fram að starfsfólk Tals stendur algjörlega fyrir utan þann ágreining," segir Ragnhildur. „Starfsfólk Tals hefur unnið að því í góðri trú að byggja upp fyrirtæki sem boðið geti hagstæðustu fjarskiptaþjónustu á markaðnum. Almenningur hefur tekið okkur fagnandi og viðskiptavinir Tals skipta nú þúsundum. Mér þykir miður að vörumerki Tals skuli hafa verið dregið inn í deilur eigenda félagsins og vona að þær verði útkljáðar sem fyrst. Deilurnar hafa hins vegar ekki áhrif á daglegan rekstur félagsins og viðskiptavinir okkar geta verið þess fullvissir að þær hafi ekki áhrif á viðskipti þeirra né viðskiptakjör."

Ragnhildur áréttar jafnframt að frumskylda hennar sem forstjóra sé að tryggja rekstur félagsins og gæta hagsmuna Tals. „Ég lýsi því yfir að ég mun rækja þær skyldur af bestu samvisku og tryggja að öllum leikreglum sé fylgt í hvívetna. Ég vil að lokum koma á framfæri þökkum til starfsfólks Tals, fyrir það mikla æðruleysi sem það hefur sýnt í þessum krefjandi aðstæðum," segir Ragnhildur að lokum.