Miðbaugsmaddaman aftur í gæsluvarðhald

Catalina Mikue Ncoco sem komst í fréttirnar fyrr á þessu ári vegna vændishúsa sem hún hélt úti á höfuðborgarsvæðinu hefur verið úrskurðuð í gæsluvarðhald til 12.maí vegna gruns um umfangsmikið fíkniefnasmygl. Karl Steinar Valsson hjá fíkniefnadeild lögreglunnar vill ekki staðfesta að Catalina eigi í hlut en útilokar ekki að konan tengist belgískum burðardýrum sem handtekin hafa verið við komuna hingað til lands undanfarið.

Catalina sem varð íslenskur ríkisborgari árið 2004 var fyrr á þessu ári úrskurðuð í gæsluvarðhald vegna gruns um fíkniefnamisferli og að hafa haft tekjur af vændi ungra kvenna, sem hún flutti mansali hingað til lands. Hún sat í gæsluvarðhaldi til 27.febrúar.

Catalina sagði síðar í viðtali við Vikuna að hún hefði tólf vændiskonur á sínum snærum hér á landi. Hún færi reglulega til Brasilíu til þess að finna konur til að stunda vændi hér á landi.

Íslenskur unnusti Catalinu var handtekinn á Schipoll flugvelli í Amsterdam um miðjan febrúar á þessu ári. Hann hafði í fórum sínum tólf kíló af kókaíni sem grunur leikur á að hafi átt að smygla hingað til lands. Ekki er búið að dæma í því máli.

„Það leikur grunur á að hún tengist umfangsmiklu fíkniefnasmygli hingað til lands," segir Karl Steinar í samtali við fréttastofu en lögregla útilokar ekki að tvær belgískar stúlkur sem voru handteknar með fíkniefni innvortis hér á landi tengist Catalinu.

Stúlkurnar voru dæmdar nýlega í tíu mánaða fangelsi en hjá lögreglu bentu þær á mynd af þeim sem skipulagði smyglið en það kom þeim til refsilækkunnar. Karl Steinar vill þó ekki staðfesta að stúlkurnar hafi bent á Catalinu. Lögregla útilokar heldur ekki tengsl milli Catalinu og belgísks pilts sem handtekinn var með fíkniefni innvortis í Leifsstöð. Sá komst í fréttirnar þegar hann slapp frá lögreglunni á suðurnesjum þegar færa átti hann í röntgenmyndatöku. Hann fannst þó skömmu síðar.

Catalina hefur kært gæsluvarðhaldsúrskurð héraðsdóms en Hæstiréttur tekur kæruna fyrir síðar í dag.