Guðjón Valur með tíu mörk

Guðjón Valur Sigurðsson skoraði tíu mörk fyrir Rhein-Neckar Löwen sem vann átta marka sigur á Minden, 28-20, í þýsku úrvalsdeildinni í kvöld.

Gylfi Gylfason skoraði tvö mörk fyrir Minden en Ingimundur Ingimundarson var ekki í leikmannahópi liðsins í kvöld.

Þá vann Hamburg mikilvægan sigur á Lemgo í baráttu liðanna um annað sæti deildarinnar, 32-24. Vignir Svavarsson skoraði eitt mark fyrir Lemgo en Logi Gunnarsson lék ekki með liðinu vegna meiðsla.

Róbert Gunnarsson skoraði fjögur mörk fyrir Gummersbach sem vann stórsigur á Stralsunder, 41-20.

En Flensburg tapaði óvænt fyrir Dormagen á útivelli, 26-20. Alexander Petersson var sem fyrr ekki með Flensburg vegna meiðsla.

Dormagen er nýliði í deildinni en er eina liðið sem hefur náð stigi af toppliði Kiel sem er með örugga forystu á toppi deildarinnar.

Hamburg er svo í öðru sæti með tveggja stiga forystu á Lemgo og Göppingen eftir sigurinn í kvöld. Hamburg er með 39 stig en er tólf stigum á eftir Kiel.

Rhein-Neckar Löwen er svo í fimmta stæinu með 36 stig, Gummersbach í því áttunda með 32 og Minden í fjórtánda sæti með sextán stig.