Segir sumar hugmyndir um fyrirvara ógilda samninginn

Málamyndafyrirvarar duga ekki í Icesave málinu, segir formaður Sjálfstæðisflokksins. Forsætisráðherra segir að hugmyndir sumra þingmanna um fyrirvara yrðu til þess að ógilda samninginn.

Icesave málið tók enn drjúgan tíma á Alþingi í dag, þegar ráðherrar voru fyrir svörum í óundirbúnum fyrirspurnum.

Bjarni Benediktsson, formaður Sjálfstæðisflokksins, spurði Jóhönnu Sigurðardóttur, forsætisráðherra, hvort stjórnin ætlaði ekki að viðurkenna mistök við Icesave samningana og leyfa tillögum stjórnarandstöðunnar um fyrirvara að njóta sín. Ekki dugi að setja fyrirvara sem ekki taki tillit til efnahagslegrar óvissu.

Jóhanna Sigurðardóttir, sagðist vilja taka eins mikið tillit og hægt væri til tillagna stjórnarliða og stjórnarandstöðu um fyrirvara.