Ferðamaðurinn kominn úr Kreppu

Erlendur ferðamaður sem slasaðist í ánni Kreppu fyrr í dag er kominn um borð í þyrlu Landhelgisgæslunnar. Hann reyndist ekki alvarlega slasaður en kaldur og hrakinn og afar skelkaður.

Björgunarsveitarmenn segja að björgun mannsins megi fyrst og síðast þakka þeirri staðreynd að hann hafi getað notað GSM síma sinn til að hringja eftir hjálp þar sem hann var einn á ferð utan alfararleiðar. Undanfarið hafi verið unnið að því að bæta fjarskipti á hálendinu. Meðal annars hafi verið settur upp endurvarpi á Vaðöldu á síðasta ári sem hafi gert gæfumuninn í þessu tilviki.

Þá segja björgunarsveitamenn að nýtt Tetra fjarskiptakerfi hafi enn og aftur sannað gildi sitt þar sem sjá má staðsetningu viðbragðsaðila á landsvísu á netinu. „Í dag vildi svo vel til að þrautreyndir björgunarsveitamenn voru á ferð í Laugavalladal og var þegar haft samband við þá. Þeir fóru á staðinn, fundu manninn og gáfu þyrlu Landhelgisgæslunnar upp nákvæma staðsetningu," segir í tilkynningu frá Slysavarnarfélaginu Landsbjörgu.