Guðjón Valur með flottan leik og níu mörk í útisigri

Guðjón Valur Sigurðsson lék mjög vel í 38-33 útisigri Rhein-Neckar Löwen á HBW Balingen-Weilstetten í þýsku úrvalsdeildinni í handbolta í kvöld. Sigurganga Kiel hélt lika áfram og liðið er nú komið með fjórtán stiga forskot á toppnum.

Guðjón Valur skoraði níu mörk í leiknum þar af aðeins 1 þeirra úr vítakasti. Guðjón Valur var markahæsti leikmaður Rhein-Neckar Löwen en næstur honum kom Pólverjinn Karol Bielecki með 8 mörk. Rhein-Neckar Löwen er með 34 stig í 4. sæti deildinnar eftir sigurinn í kvöld.

Lærisveinar Alfreðs Gíslasonar í Kiel unnu sinn 24. leik í röð í deildinni þegar liðið vann 42-35 sigur á Melsungen. Tékkinn Filip Kicha skoraði 11 mörk í leiknum og Svíinn Kim Andersson var með 8 mörk. Eftir þennan sigur er Kiel með fjórtán stiga forskot á Hamburg og Lemgo.