Kostnaður við sólarhringsvistun fanga á við meðal hótelherbergi

Kostnaðurinn við að vista fanga hvern sólarhring er á við meðal hótelherbergi. Líkt og Vísir greindi frá í morgun kostar sólarhringsvistun í fangelsi um 24 þúsund krónur, samkvæmt upplýsingum frá Fangelsismálastofnun. „Ef þú tekur það sem lagt er til fangelsismála á ári og deilir því á fjölda fanga og þá er allt innifalið húsið, öryggisgæslan, matur, sálfræðiþjónusta og fleira þá er það í kringum 24 þúsund krónur sólarhringurinn," sagði Páll Winkel fangelsismálastjóri í samtali við Vísi.

Til samanburðar má nefna að dýrasta eins manns herbergi á Eddu hóteli, svokallað Eddu plús, kostar 12.400 krónur. Eins manns herbergi með morgunmat á Hótel Sögu kostar 32.300 miðað við septembermánuð. Þá kostar eins manns herbergi á vinsælasta Foss-hótelinu um 23 þúsund krónur og er þá miðað við herbergi með baði og morgunverði.

Líkt og fram kom í máli Páls reiknast inn í kostnað vegna fangelsisvistunar atriði sem koma hótelrekstri ekkert við, eins og sálfræðiþjónusta. Þá er fullt fæði inni í kostnaði vegna fangelsisvistunar.