Halvorsen opin fyrir myntsamstarfi Noregs og Íslands

Kristin Halvorsen fjármálaráðherra Noregs er opin fyrir myntsamstarfi milli Noregs og Íslands. Þetta kemur fram á vefsíðunni e24.no í dag. Segir Halvorsen í tölvupósti til síðunnar að hún muni ræða málið við Steingrím J. Sigfússon fjármálaráðherra Íslands.

Sem kunnugt er af frétt Fréttastofu um málið í gær mun Halvorsen koma til Íslands um næstu helgi til að taka þátt í 10 ára afmælisfagnaði VG. Í tölvupóstinum segir Halvorsen: "Ég mun ræða ýmsar ólíkar hliðar efnahagsástandsins á Íslandi við Steingrím J. Sigfússon fjármálaráðherra, og þar á meðal myntsamstarf ef það mál kemur á borðið."

Ein og kunnugt er af fréttum Fréttastofu er formaður norska Miðflokksins og samgönguráðherra Noregs, Liv Signe Navarsete, áhugasöm um að Ísland og Noregur komi sér upp myntsamstarfi.

Og það eru fleiri Norðmenn áhugasamir um slíkt samstarf. Leiðari Dagens Næringsliv fjallar um slíkt samstarf og þar er mælt með því að málið sé kannað til þrautar.

Klassekampen ræðir við hagfræðiprófessorinn Öystein Noreng um málið sem segir að Norðmenn geti hagnast á því að hafa sameiginlega mynt með Íslandi. "Það þjónar hagsmunum Norðmanna að stöðugleiki ríki á Íslandi. Myntsamstarf er það besta sem við getum boðið í því sambandi," segir prófessorinn.

Noreng nefnir að það myndi styrkja Noreg á alþjóðavettvangi að eiga náið samstarf við Íslands, einkum með norðurhöfin í huga og nýtingu auðlinda í Barentshafi.

"Nú þegar ESB og Rússar standa í biðröð eftir að bjarga Íslandi verður Noregur einnig að huga að því að tryggja sína eigin þjóðarhagsmuni í framtíðinni," segir prófessorinn.