Saving Iceland gagnrýna fréttaflutning af mótmælum

Umhverfishreyfingin Saving Iceland stóð fyrir mótmælum við Iðnaðarráðuneytið í gær. Á sama tíma átti sér stað undirritun fjárfestingarsamnings ríkisstjórnarinnar og Norðuráls vegna álvers í Helguvík. Mótmælendur skvettu grænu skyri á ráðuneytið og bifreið Iðnaðarráðherra sem hafði verið lagt fyrir utan.

Fimm voru handteknir vegna mótmælanna og kom til átaka milli mótmælenda og lögreglu. Að sögn lögreglu var sparkað í höfuð eins lögreglumanns en Saving Iceland samtökin segja í yfirlýsingu sem þau sendu frá sér í morgun, engar sannanir liggja fyrir um ofbeldi gegn lögreglu. Þvert á móti hafi ofbeldið verið af hálfu lögreglu og þau hafi myndbönd máli sínu til stuðnings.

Samtökin gagnrýna fjölmiðla vegna fréttaflutnings af mótmælunum. Þau segja fjölmiðla notast við þá tækni að leita að viðmælendum sem segi þá sögu sem fjölmiðlarnir vilji sjálfir heyra, og klippi svo eftir hentugleika.Þá segjast samtökin hafa myndband því til stuðnings að ofbeldið hafi verið af hálfu lögreglu, en ekki mótmælenda.

Milli tuttugu og þrjátíu manns úr Saving Iceland hópnum mótmæltu handtöku félaga sinna fimm frá því fyrr um daginn, fyrir utan lögreglustöðina á Hverfisgötu í nótt. Tveir voru handteknir í þeim mótmælum þar sem þeir fóru ekki að fyrirmælum lögreglu.

Mótmælendurnir grýttu eggjum í lögregluna og börðu rúður við lögreglustöðina. Lögreglan hefur sleppt öllum úr haldi, bæði þeim sem handteknir voru í nótt og þeim sem handteknir voru fyrr í gærdag.

Myndbandið sem Saving Iceland telur sanna sitt mál má sjá hér.