Þvo í þágu góðs málstaðar

„Þetta er fínt, maður má bara ekki horfa of mikið niður,“ segir Hildur Arnardóttir, meðlimur í Hjálparsveit skáta í Reykjavík, sem varði gærdeginum hangandi í sjötíu metra hæð yfir jörðu utan í háhýsinu við Höfðatorg.

Nokkrum meðlimum hjálparsveitarinnar bauðst að þvo gluggana á tveimur efstu hæðum hússins til að styrkja sveitina og stendur verkið nú yfir.

Á menningarnótt mun sveitin halda björgunarsýningu, meðal annars strengja um 200 metra línubrú frá toppi hússins yfir í Höfða.

„Ég er nú ekkert lofthrædd,“ segir Hildur, sem bæði hefur prófað að síga í klettum og fara í ísklifur. Svona hátt hefur hún hins vegar aldrei hangið fyrr, og segir hún það jafnvel hafa komið sjálfri sér dálítið á óvart hversu létt það reyndist henni. - sh