Safnaði 1,3 milljónum í hlaupi

Gunnlaugur Júlíusson hlaupari safnaði rúmlega 1,3 milljónum til styrktar Grensásdeild á hlaupi sínu frá Reykjavík til Akureyrar á dögunum. Hann afhenti féð í gær og voru það Hollvinasamtök Grensásdeildar og Edda Heiðrún Backman leikkona sem tóku á móti fénu.

Ungmennafélag Íslands skipulagði hlaupið ásamt Gunnlaugi, en með því vildu þau vekja athygli á fjársöfnun Eddu Heiðrúnar fyrir deildina. Verkefnið heitir „Á rás fyrir Grensás" og var Gunnlaugur fyrstur manna til að hlaupa fyrir átakið. Fleiri munu bætast í hópinn þegar fram líða stundir.