Brunabíla-Ragnar dæmdur til að greiða fimm milljónir

Fyrrum skemmtistaðaeigandinn Ragnar Magnússon, stundum kallaður Brunabílaragnar, var dæmdur, ásamt konu, bróður og föður, til þess að greiða Ölgerð Egils Skallagrímssonar fimm milljónir vegna ógreiddra reikninga.

Hvorki Ragnar né annar úr fjölskyldu hans mættu niður í héraðsdóm til þess að vera viðstaddur dómsuppsöguna. Upphafleg krafa Ölgerðarinnar hljóðaði upp á sex og hálfa milljón króna.

Skuldin gagnvart Ölgerðinni var tilkominn eftir að Ragnar rak skemmtistaðinn Café Oliver. Svo virðist sem skemmtistaðurinn hafi verið dramatískur örlagavaldur í lífi Ragnars því hann sakaði fyrrum eigendur staðarins, um að hafa sigað handrukkara á sig. Það var aldrei sannað þrátt fyrir að Ragnar lagði inn kæru þess eðlis hjá lögreglunni á Höfuðborgarsvæðinu. Hann vildi þá meina að hann hefði verið þvingaður til þess að afsala sér staðnum til fyrri eiganda.

Ragnar varð landsþekktur eftir rimmu sína við meinta handrukkarann Benjamín Þór Þorgrímsson, stundum kallaður Benni Ólsari. Kompás náði myndskeiði af Benjamíni að ganga hrottalega í skrokk á Ragnari en árásin, auk tveggja annarra, voru kærðar til lögreglu og eru nú fyrir Héraðsdómi.

Að auki átti hann fjölmarga glæsibíla sem brunnu í Vogunum haustið 2007 en lögreglan rannsakaði málið sem íkveikju. Tugmilljóna tjón varð af brunanum en aldrei fannst brennuvargurinn. Bílarnir voru geymdi á bílaplani í umsjá handrukkarans Annþórs Karlssonar.