Birgir vildi vita hvort samskiptin við norrænu ríkin hefðu verið óljós

Birgir Ármannsson, þingmaður Sjálfstæðisflokksins, spurði forsætisráðherra að því á Alþingi í dag hvort það gæti verið að eitthvað óljóst hafi verið í því á hvaða forsendum norrænu ríkin veittu Íslandi lán sem beðið hefur verið eftir um allnokkurt skeið.

Vísaði Birgir í skýrslu sænsku ríkisstjórnarinnar til þingsins þar í landi þar sem stendur að norrænu lánveitendurnir hafi gert það að skilyrði að Ísland næði samkomulagi við Bretland og Holland um lánveitingar vegna innistæðutrygginga. Nefnt væri til skýringa að norrænir lánveitendur vildu útiloka að lánin rynnu til Bretlands og Hollands. Sagði Birgir að þarna hefði greinilega verið misskilningur á ferðinni. Hann velti því fyrir sér hvort um væri að ræða útbreiddan misskilning.

Jóhanna Sigurðardóttir sagðist ekki geta fallist á það að samningar um lánin hefðu verið gerðir á einhverjum óljósum forsendum. Lánin væru ekki tengd Icesave samningum að neinu leyti en þau væru liður í þeirri áætlun sem unnin er með Alþjóðagjaldeyrissjóðnum.

Alþjóðagjaldeyrissjóðurinn frestaði í byrjun mánaðar endurskoðun á efnahagsáætlun Íslendinga á þeirri forsendu að norrænu lánin hefðu ekki borist ennþá.