Skilanefnd í málaferlum við stjórnarformann Icelandair

Skilanefnd Glitnis stendur í málaferlum við félag í eigu Sigurðar Helgasonar, nýkjörins stjórnarformanns Icelandair, vegna gjaldfallinnar skuldar. Sigurður og félag hans Skildingur skulda Glitni einn og hálfan milljarð. Skilanefndin hefur meðal annars kyrrsett tugmilljóna króna innistæðu félagsins.

Fyrirtækið Skildingur var stofnað árið 2004 um hlutabréf í FL Group. Sigurður stofnaði félagið ásamt þáverandi lykilstjórnendum Flugleiða.

Samkvæmt ársreikningi Skildings frá árinu 2007 átti félagið hluti í Bakkavör, Kaupþingi og Landsbankanum. Eignir félagsins hafa rýrnað til muna við bankahrunið.

Skildingur skuldar Glitni einn og hálfan milljarð króna en skuldin er á gjalddaga árið 2010. Skilanefnd Glitnis hefur nú höfðað mál á hendur Skildingi fyrir Héraðsdómi Reykjavíkur. Tryggingar dugi ekki fyrir skuldinni.

Þá hefur skilanefndin kyrrsett níutíu milljóna króna innistæðu sem Skildingur átti hjá bankanum, að því er heimildir fréttastofu herma.

Sigurður Helgason, einn eiganda félagsins, var nýlega kjörinn stjórnarformaður Icelandair Group. Nýju og gömlu bankarnir hafa tekið félagið yfir að mestu.

Sigurður situr í stjórn Icelandair fyrir hönd Íslandsbanka. Bankinn er í eigu og umsjón ríkisins en hann tók nýlega yfir rúmlega fjörutíu prósenta hlut í flugfélaginu.

Skildingur hefur aðsetur á heimili Sigurðar í Skildinganesi 22.