Björn Ingi hættur á Markaðnum - áfram á skjánum

Björn Ingi Hrafnsson hefur látið af störfum sem ritstjóri Markaðarins, fylgirits Fréttablaðsins. Hann mun hinsvegar halda áfram með sjónvarpsþátt sinn Markaðurinn með Birni Inga á Stöð 2. Einnig ætlar hann að láta gamlan draum rætast og stofna eigin fjölmiðil á netinu.

Björn Ingi tók við ritstjórastóli á Markaðnum í apríl á síðasta ári ásamt Björgvini Guðmundssyni sem nú ritstýrir viðskiptahluta Morgunblaðsins.

„Á undanförnum mánuðum hefur því miður þurft að rifa seglin þar á öllum sviðum, með fækkun starfsfólks, minna blaði og nú síðast fækkun útgáfudaga.  Slíkar ráðstafanir eru auðvitað skiljanlegar í árferði sem þessu og í framhaldi af því varð niðurstaða milli mín og stjórnenda blaðsins í dag um að ég láti af störfum sem viðskiptaritstjóri á Fréttablaðinu. Þakka ég samstarfsfólki mínu á Markaðnum og Fréttablaðinu einstaklega áhugaverð kynni á undanförnum mánuðum,“ skrifar Björn Ingi á bloggsíðu sína í dag.

„Ég verð áfram með þáttinn minn, Markaðinn með Birni Inga á Stöð 2, og ætla að láta verða af gömlum draumi sem ég lengi gengið með í maganum, sem er að stofna eigin fjölmiðil með fréttum, skoðunum og fréttaskýringum á Netinu. Vonast ég til þess að hann komist í gagnið á næstu vikum, enda nóg um að fjalla í þjóðfélaginu þessa dagana.“