Upptaka til af fjárkúgun gegn Jóni Ásgeiri

Jón Ásgeir Jóhannesson, segir í viðtali við Vísi að nokkru áður en Morgunblaðið fékk póst um svokallað „game plan" franska skíðaskálans sem Morgunblaðið sagði frá í morgun þá hafi íslenskur lögfræðingur reynt að kúga hann til þess að borga þrjár milljónir fyrir plaggið.

Jón Ásgeir fullyrðir að lögmaðurinn hafi tvisvar komið á fund með lögmanni sínum, Einari Þór Sverrissyni, og í annað skiptið hafi fundurinn verið hljóðritaður. Í fyrstu fréttum af málinu var sagt frá því að blaðamaður hefði reynt að kúga fé út úr Jóni en það var byggt á misskilningi.

Jón neitaði að borga uppsett verð fyrir tölvupóstinn sem virðist hafa endað í höndum lögmannsins fyrir mistök.

Fjárkúgunargögn í hendur blaðamanns

„Og í kjölfarið hringir blaðamaður í mig og segir að hann sé að koma upp um þrjúhundruð milljarða svindl," segir Jón Ásgeir en pósturinn virðist hafa endað í höndum blaðamanns Morgunblaðsins þegar mútutilraunin mistókst. Pósturinn var birtur með frétt um franska skíðaskálann í Morgunblaðinu í dag. Þar kom fram nokkurskonar leikjaáætlun Jóns varðandi franska skíðaskálann í Courchevel sem er í eigu Gaums.

Kaupin á skálanum eiga að hafa verið fjármögnuð með láni frá Glitni. Skuldir Baugs við bankann námu 42 milljörðum króna þegar félagið fór í þrot.

Aðspurður hvað blaðamaðurinn drukkni á Morgunblaðinu heitir vill Jón ekki gefa það upp.

„Þetta er virtur blaðamaður," svarar Jón Ásgeir þegar gengið er á hann.

Þess má geta að í hádegisfréttum Bylgjunnar sagði Björgvin Guðmundsson, fréttastjóri viðskiptafrétta Morgunblaðsins að hvorki Þorbjörn Þórðarson né Þórður Snær Júlíusson, skráðir höfundar greinarinnar, hafi haft samband við Jón drukknir.

Kærði ekki fjárkúgun

Jón Ásgeir segir að sér hafi verið brugðið þegar blaðamaðurinn drukkni hringdi í hann með hótanir. Jón segir að augljóslega hafi verið búið að bæta við núllum í skjalið. Það hafi ekki sýnt rétta mynd af viðskiptunum.

„Það var búið að eiga við það. Núllin eru bara þvæla," segir Jón en í yfirlýsingu frá Morgunblaðinu kemur fram að ritstjórn Morgunblaðsins hafi enga ástæðu til þess að efast um upplýsingarnar og telja þær áreiðanlega heimild.

Spurður hvort hann hafi kært lögmanninn fyrir fjárkúgun segir Jón Ásgeir að það hafi hann ekki gert. Spurður hversvegna ekki svarar hann: „Okkar reynsla af Ríkislögreglustjóra er þannig að við töldum ekki að tekið yrði á málinu þar."

Spurður hver lögmaðurinn er vill Jón ekki gefa það upp.

Segir blaðamann áreita sig

Spurður um viðbrögð vegna athugasemdar ritstjórnar Morgunblaðsins, þar sem því er haldið fram að ásakanir hans séu hugarburður segir Jón Ásgeir að þetta sé í annað skiptið sem slíkt er sagt við hann af ritstjóra Morgunblaðsins.

„Forveri Ólafs [Þ. Stephensen ritstjóra Morgunblaðsins] hefur áður sagt hlutina vera hugarburð minn. Það var árið 2003 þegar ég sagði að blaðið stæði á bak við uppruna Baugsmálsins. Það kom síðar í ljós að ég hafði rétt fyrir mér þegar tölvupóstarnir fundust," segir Jón Ásgeir og vitnar þar í tölvupósta Jónínu Benediktsdóttur og voru birtir í Fréttablaðinu sem síðar varð að dómsmáli oftast kallað Baugsmál.

Jón segir að Ólafur, ritstjóri Morgunblaðsins, viti nákvæmlega um málefni blaðamannsins sem á að hafa hringt drukkinn í hann og haft í hótunum.

„Þetta er ekki í fyrsta skiptið sem blaðamaðurinn hringir í mig og hefur í hótunum," segir hann og fullyrðir að hann hafi sent fulltrúa sinn á fund með Ólafi fyrr á árinu til þess að ræða þetta áreiti sem hann vill meina að hann verði fyrir af hálfu blaðamannsins.

Jón Ásgeir er eigandi 365 miðla sem fréttastofa Vísis heyrir undir.