Sjöundi útisgur Villa í röð

Um helgina vann Aston Villa sinn sjöunda leik á útivelli í röð sem er besti árangur liða í ensku úrvalsdeildinni ef stóru fjögur félögin eru frátalin.

Villa vann 2-0 sigur á Blackburn um helgina en rispan hófst þann 15. nóvember síðastliðinn.

Chelsea hefur unnið flesta leiki á útivelli í röð en liðið vann níu talsins tímabilið 2004-5.

Portsmouth kemur næst á eftir Aston Villa með sex útisigra í röð en Newcastle, Aston Villa, Leeds og Charlton hafa öll unnið fimm útileiki í röð.

Villa hefur nú fengið alls 49 stig eftir fyrstu 25 leiki tímabilsins sem er félagsmet. Gamla metið var 47 stig sem liðið setti tímabilið 1992-93.