Skiptar skoðanir í þingvallanefnd um Valhöll

Sjö þingmenn voru í gær kjörnir í Þingvallanefnd. Þeir þingmenn sem Fréttablaðið ræddi við í gær voru fráleitt á einu máli um fyrsta stóra málið sem bíður nefndarinnar, framtíð reitsins þar sem Hótel Valhöll stóð.

Hótel Valhöll brann til kaldra kola 10. júlí síðastliðinn. Engin ákvörðun hefur enn verið tekin um hvort byggja eigi að nýju á reitnum, eða láta torf sem nú hefur verið lagt yfir reitinn halda sér.

„Mín persónulega skoðun er að það eigi ekki að byggja á reitnum," segir Valgerður Bjarnadóttir, fulltrúi Samfylkingarinnar nefndinni. „Ég er þeirrar skoðunar að þarna eigi að vera samkomustaður fyrir alla Íslendinga, en ég hef ekki mótað mér skoðun á því hvers eðlis sá staður ætti að vera," segir Höskuldur Þórhallsson, fulltrúi Framsóknarflokks í nefndinni.

Ragnheiður Elín Árnadóttir, fulltrúi Sjálfstæðisflokks telur ólíklegt að hótelrekstur verði á Þingvöllum í framtíðinni.

Að auki eru í nefndinni Álfheiður Ingadóttir, Atli Gíslason, VG, Björgvin G. Sigurðsson, Samfylkingu, og Þorgerður Katrín Gunnarsdóttir, Sjálfstæðisflokki.