Enn á gjörgæslu eftir slysið á Grundartanga

Líðan mannsins sem brenndist illa á fótum við vinnu í álverinu á Grundartanga í gær er eftir atvikum góð. Hann er enn á gjörgæslu og fór í aðgerð í gær þar sem gert var að brunasárunum. Að sögn vakthafandi læknis tókst aðgerðin vel.

Maðurinn sem er á þrítugsaldri, var að vinna við að skipta um rafskaut í einu kerinu þegar hann rann til og lenti með fæturna í kerinu. Hann var í sérstökkum hlífðarskófatnaði sem kolaðist samstundis í hitanum, en deiglan í kerinu var hátt í þúsund gráðu heit.

Vinnueftirlitið kannar nú tildrög slyssins. Hvort öryggi sé ábótavant í álverinu eða hvort starfsmaðurinn hafi ekki farið eftir öryggisreglum.

Maðurinn sem er háskólanemi var í sumarvinnu í álverinu.