Guðmundur: Rennum blint í sjóinn

Guðmundur Guðmundsson landsliðsþjálfari segir að vegna mikilla meiðsla í herbúðum íslenska landsliðsins renni hann nokkuð blint í sjóinn fyrir leikina mikilvægu gegn Makedóníu og Eistlandi í næstu viku.

Leikirnir eru liður í undankeppni EM 2010 en Ísland leikur í 3. riðli undankeppninnar. Liðið er með þrjú stig eftir tvo leiki en efstu tvö liðin úr hverjum riðli komast til Austurríkis á næsta ári.

Noregur er í efsta sæti með sjö stig eftir fjóra leiki en Makedónía er með þrjú stig eftir tvo leiki, rétt eins og Ísland.

Bæði Ísland og Makedónía hafa unnið sigur á botnliði Belga sem er í neðsta sæti án stiga eftir fjóra leiki. Makedónar gerðu hins vegar jafntefli við Eistland í hinum leik sínum í riðlakeppninni í haust en Ísland náði jafntefli gegn Norðmönnum ytra í hinum leik sínum.

Staða Íslands er því nokkuð sterk í riðlinum og myndi styrkjast verulega með sigri á Makedóníu á miðvikudaginn kemur.

Ísland mætir svo Eistlandi á heimavelli á sunnudaginn eftir viku en báðir þessir leikir verða í beinni útsendingu á Rúv.

Guðmundur segir þó að staða liðsins sé ekki neitt sérstaklega góð vegna meiðsla margra leikmanna.

„Vignir Svavarsson verður í leikbanni gegn Makedóníu og Logi Geirsson á við meiðsli í öxl að stríða. Ásgeir Örn Hallgrímsson, Arnór Atlason og Snorri Steinn Guðjónsson eru allir meiddir á hné og þá eru þeir Guðjón Valur Sigurðsson og Einar Hólmgeirsson nýkomnir aftur af stað eftir meiðsli."

Guðmundur valdi nítján manna hóp fyrir leikina tvo af skiljanlegum ástæðum. „Hópurinn er stærri en maður hefði valið öllu jöfnu en það var gert vegna óvissu um stöðu liðsins," sagði Guðmundur.

„Liðið kemur ekki allt saman fyrr en á mánudaginn og því fáum við mjög stuttan tíma til að undirbúa okkur fyrir leikinn auk þess sem við þurfum að leggjast í langt ferðalag. Við rennum því nokkuð blint í sjóinn varðandi stöðu liðsins þegar í leikinn verður komið."