Frjálslyndir: Í nýju húsi og lofa bombu

Í frétt sem birtist á heimasíðu Frjálslynda flokksins í kvöld er sagt frá fjárhagslegri endurskipulagningu flokksins og hún sögð ganga samkvæmt áætlun.

Framkvæmdastjórn flokksins er sögð vinna að mjög ákveðnum tillögum fjármálaráðs Frjálslyndra, sem þó mun ekki tímabært að skýra frá í smáatriðum að svo stöddu.

Þó megi segja frá því að flokkurinn sé kominn í nýtt húsnæði að Lynghálsi 3, sem hefur að sögn alla kosti hins gamla húsnæðis í Skúlatúni en sé margfalt ódýrara.

Athygli vekur að undir lok fréttarinnar er einhverskonar bombu lofað frá flokknum með haustinu, eða eins og það er orðað:

„Líklegt er að Frjálslyndi flokkurinn muni stimpla sig nokkuð ákveðið inn í stjórnmálaumræðuna á Íslandi í haust með óvæntri fréttatilkynningu."

Fréttina í heild sinni má sjá hér, en þar kemur einnig fram hörð gagnrýni á ríkisstjórnina.

Flokkurinn á ekki sæti á þingi.