HM: Frakkar með fullt hús stiga

Ólympíumeistarar Frakkland undirstrikuðu styrkleika sinn í kvöld er liðið vann sigur á Ungverjum, 27-22, í A-riðli á HM í handbolta í Króatíu. Staðan í hálfleik var 13-8.

Frakkar unnu því alla leiki sína í riðlakeppninni nokkuð örugglega og fara inn í millriðlakeppnina með fjögur stig.

Fyrr í dag vann Slóvakía sigur á Rúmeníu, 28-23, og tryggði sér þar með sæti í milliriðlakeppninni en Ungverjar voru þegar öruggir með sæti þar.

Þar sem Ungverjar og Slóvakar gerðu jafntefli í sínum leik fara bæði lið með eitt stig með sér í milliriðlakeppnina. Liðin voru einnig með jafnt markahlutfall en Slóvakar náðu öðru sæti riðilsins þar sem þeir skoruðu fleiri mörk en Ungverjar í riðlakeppninni.