HM-samantekt: Óvænt tap Norðmanna

Norðmenn naga sig í handarbökin í kvöld eftir að þeir töpuðu óvænt fyrir Serbíu á heimsmeistaramótinu í handbolta sem fer fram í Króatíu.

Norðmenn eru þó komnir áfram í milliriðlakeppnina en verða nú að treysta á hagstæð úrslit í lokaumferðinni á morgun til að taka með sér stig upp úr riðlinum.

Vísir tekur hér saman úrslit dagsins. 24 lið eru mætt til leiks í Króatíu og keppa í fjórum sex liða riðlum. Þrjú efstu liðin í hverjum riðli komast áfram í milliriðla og taka með sér stigin sem þau fengu gegn öðrum liðum sem einnig komust áfram upp úr riðlinum.

Frakkland, Ungverjaland, Króatía, Svíþjóð, Þýskaland, Pólland og Danmörk eru einnig komin áfram í milliriðlakeppnina og ræðst það á morgun hvaða lið fylgja þeim.

Spánverjar eru í erfiðum málum eftir tíu marka tap fyrir heimamönnum í dag og eiga fyrir höndum hreinan úrslitaleik gegn Suður-Kóreu á morgun um sæti í millriðlakeppninni. En það er ljóst að þó svo að Spánverjar kæmust áfram verða þeir í milliriðlakeppninni án stiga.

A-riðill:

Úrslit:

Ástralía - Rúmenía 20-40

Ungverjaland - Argentína 31-20

Slóvakía - Frakkland 26-35

Staðan:

Frakkland 8 stig (+57 í markatölu)

Ungverjaland 7 (+38)

Slóvakía 5 (+28)

Rúmenía 4 (+11)

Argentína 0 (-24)

Ástralía 0 (-110)

Ólymíumeistarar Frakka hafa haft það fremur náðugt í riðlakeppninni en mæta sterkasta andstæðingnum í riðlinum, Ungverjalandi, á morgun í hreinum úrslitaleik um efsta sæti riðilsins. Leikurinn skiptir miklu máli þar sem liðin sem komast áfram í milliriðlakeppnina taka með sér stigin áfram sem þau unnu sér inn gegn hinum liðunum sem einnig komust áfram.

Ungverjaland tryggði sér sæti í milliriðlakeppninni með öruggum sigri á Argentínu sem er stigalaust, rétt eins og Ástralía.

Rúmenía og Slóvakía eru í baráttu um þriðja og síðasta sætið sem veitir þátttökurétt í milliriðlakeppninni og mætast í lokaumferðinni á morgun. Slóvakíu dugir jafntefli en getur með sigri náð Ungverjum að stigum, svo lengi sem að Frakkar vinna Ungverja.

Þar sem Ungverjar og Slóvakar gerðu jafntefli í sínum leik ræðst það á markatölu hvort liðið lendir í öðru sæti ef liðin verða jöfn að stigum. Þar standa Ungverjar betur að vígi en hindrunin er þó ekki óyfirstíganleg fyrir Slóvaka - það myndi þó fyrst og fremst ráðast af því hversu stór sigur Frakka á Ungverjum yrði.

Leikir í lokaumferð:

Argentína - Ástralía

Slóvakía - Rúmenía

Frakkland - Ungverjaland

B-riðill:

Úrslit:

Kúba - Suður-Kórea 26-31

Svíþjóð - Kúvæt 30-19

Spánn - Króatía 22-32

Staðan:

Króatía 8 stig (+51 í markatölu)

Svíþjóð 8 (+48)

Spánn 4 (+41)

Suður-Kórea 4 (+13)

Kúvæt 0 (-75)

Kúba 0 (-78)

Heimamenn í Króatíu unnu afar öflugan tíu marka sigur á Spánverjum sem virðast ekki upp á sitt besta í mótinu. Þeir töpuðu einnig fyrir Svíum og eiga á morgun hreinan úrslitaleik gegn Suður-Kóreu um hvort liðið kemst áfram í milliriðilinn. Spánverjum dugir þó jafntefli en ljóst er að það lið sem fer áfram fer þangað stigalaust.

Hins vegar eru Króatar og Svíar enn með fullt hús stiga og mætast því í lokaumferðinni á morgun. Króatar eru með betra markahlutfall og dugir því jafnteflið.

Leikir í lokaumferð:

Kúvæt - Kúba

Spánn - Suður-Kórea

Króatía - Svíþjóð

C-riðill:

Úrslit:

Alsír - Rússland 28-29

Makedónía - Þýskaland 23-33

Pólland - Túnis 31-27

Staðan:

Þýskaland 7 stig (+24 í markatölu)

Pólland 6 (+22)

Rússland 5 (+4)

Makedónía 4 (+3)

Túnis 2 (-10)

Alsír 0 (-43)

Íslandsbanarnir í Makedóníu fengu tíu marka skell gegn heimsmeisturum Þjóðverja í dag og eiga á morgun hreinan úrslitaleik gegn Rússum á morgun um hvort liðið kemst áfram í milliriðlakeppnina.

Makedónía á þó enn góðan möguleika að ná öðru sætinu í riðlinum þar sem liðið getur jafnað Pólland að stigum. Makedónía vann óvænt innbyrðisviðureign liðanna og hafnar því í öðru sæti ef liðið vinnur Rússa á morgun og Pólland tapar fyrir Þýskalandi.

Þýskaland og Pólland munu mætast í lokaumferðinni á morgun í úrslitaleik um efsta sæti riðilsins. Pólverjar unnu fjögurra marka sigur á Túnis í dag og tryggðu sér um leið sæti í milliriðlakeppninni, rétt eins og Þjóðverjar.

Rússar tefla hins vegar á tæpasta vaði en dugar þó jafntefli gegn Makedóníu á morgun. Rússland vann nauman sigur á botnliði Alsír í dag, 28-29, þar sem markvörðurinn Kostygov var bjargvættur Rússa er hann varði tvö skot á síðustu mínútu leiksins.

Leikir í lokaumferð:

Makedónía - Rússland

Þýskaland - Pólland

Túnis - Alsír

D-riðill:

Úrslit:

Sádí-Arabía - Brasilía 24-26

Noregur - Serbía 26-27

Egyptaland - Danmörk 17-26

Staðan:

Danmörk 8 stig (+42 í markatölu)

Noregur 6 (+43)

Brasilía 4 (-27)

Serbía 4 (+6)

Egyptaland 2 (-19)

Sádí-Arabía 0 (-45)

Norðmenn fóru illa að ráði sínu í dag er þeir töpuðu fyrir Serbum, 27-26. Norðmenn eru þrátt fyrir það öruggir áfram í millriðlakeppnina en verða að vinna Dani í dag til þess að vera öruggir með að fara með einhver stig með sér upp úr riðlinum.

Fyrir tveimur dögum töpuðu Serbar afar óvænt fyrir Brasilíu og var því stillt upp við vegg í dag. Marko Vujin var hetja Serba í dag en hann skoraði sex af síðustu sjö mörkum sinna manna í leiknum og kom sínum mönnum í 27-25 þegar skammt var til leiksloka.

Miðað við leikina í lokaumferðinni eru góðar líkur á því að Noregur, Serbía og Brasilía verða öll með sex stig að riðlakeppninni lokinni. Aðeins tvær þeirra þjóða komast áfram í milliriðlakeppnina og ræðst það á árangri í innbyrðisviðureignum.

Ef sú staða kemur upp munu Norðmenn verða í öðru sæti riðilsins, Serbar í því þriðja og Brasilíumenn fjórða. Brasilía verður því að vinna sinn leik og treysta á að annað hvort Noregur nái stigi gegn Danmörku eða að Serbíu mistakist að vinna Sádí-Arabíu til þess að komast áfram.

Það voru gríðarleg vonbrigði fyrir Norðmenn að tapa fyrir Serbum í dag því eftir góða byrjun voru þeir farnir að gæla við að fara í millriðlakeppnina með minnst tvö stig. Það gæti þó enn hafist. Ef þeir ná til að mynda jafntefli gegn Dönum á morgun og Brasilía vinnur sinn leik, fara Norðmenn með þrjú stig í milliriðilinn - fjögur ef þeir vinna Dani (og Brasilía vinnur sinn leik)

Leikir í lokaumferð:

Serbía - Sádí-Arabía

Egyptaland - Brasilía

Danmörk - Noregur